Matadalan Ba Malu nian Prosesu Selesaun
Servisu hamutuk ho parseiru oioin no rede sira ne’ebé iha Timor-Leste no Austrália, programa ida-ne’e identifika partisipantes potensial liu husi konsultasaun no rekomendasaun sira. Feto sira hetan rekomendasaun ba seleksaun, depois sei liu husi prosesu aplikasaun ba intervista no sei iha konsultasaun bo’ot ho organizasaun, komunidade no sponsor sira ne’ebé involve atu asegura kandidatu ne’e bele duni no iha apoiu ne’ebé adekuadu, hafoin konsulta RMIT English Worldwide (REW) atu halo nomeasaun. Impaktu husi programa ne’e ba partisipante sira nia familia no situasaun ba sira nia servisu mós konsidera ho koidadu atu asegura katak iha asisténsia ne’ebé naton molok hahú kursu ruma.
Aplikante ne’ebé ita hakarak atu atrai ba programa ne’e mak feto sira:
- ne’ebé iha involvimentu ho sira nia komunidade iha Timor-Leste
- ne’ebé hatudu karateristiku mentalidade-komunidade no lideransa
- ne’ebé hatudu inisiativa no bele halo komitmentu ne’ebé firme relasiona ho sira nia estudu
- ema ida-ne’ebé dala ruma laiha oportunidade no aksesu ba edukasaun no viazen
- ema ida-ne’ebé iha interese ba sira nia komunidade ninia dezenvolvimentu
Ho kualidade hirak ne’e hein katak kandidatu sira sei fahe sira nia esperiénsia no utiliza sira nia koñesimentu atu halo kontribuisaun positivu iha sira nia komunidade nia le’et bainhira sira fila fali mai.
Bainhira hili tiha ona, aplikante sira sei hetan treinamentu programa lingua Inglés gratuita ba kolokasaun ne’ebé feitu iha semana 10 nia laran ne’ebé hala’o husi RMIT English Worldwide (REW) iha Melbourne, Austrália. Tamba programa ne’e halo atu hatan ba aplikante sira nia nesesidade, sei laiha pre-rekezitus ba programa no teste profisensia ba lingua sei hala’o bainhira iha Austrália ho nivel kursu ne’ebé apropriadu ne’ebé sei determina husi staff REW (nivel kursu hahú husi‘Elementary’ to’o ‘Advanced Plus’)
Aleinde komponente lingua husi programa ne’e, partisipante sira mós hetan oportunidade atu eksplora Melbourne, partispa iha Universidade nia moris, no atu iha kontaktu ho familia no komunidade Australianu sira. Orientasaun, akompnãmentu, no asisténsia servisu seluk mós sei oferese ba Matadalan ba Malu ninia voluntariu sira.