Relatóriu ba Forum iha lia-Tetun no lia-Inglés (PDF)
Tinan ida-ne’e, 2005, marka tinan datoluk ba Timor-Leste nia independénsia formál no tinan neen husi loron ne’ebé Indonézia sai husi Timor-Leste iha tinan 1999. Programa rekonstrusaun no dezenvolvimentu longu-prazu nian kontinua hala’o iha Timor-Leste, no programa barak maka tau foku ba asuntu hirak ne’ebé afeta feto sira.
Iha kontestu ida-ne’e, ‘Dezafiu no Oportunidade’ buka atu hakbiban hanoin no esperiénsia husi partisipante sira, inklui feto Timoroan sira no reprezentante hosi organizasaun internasionál, atu esplora kestaun prinsipál tolu:
1. Prátika no supozisaun husi organizasaun internasionál sira ne’ebé servisu ho feto Timoroan sira;
2. Oinsá feto Timoroan sira hatán ba prátika ne’e; no
3. Oinsá prezensa internasionál fó impaktu ba feto sira iha Timor-Leste.
‘Dezafiu no Oportunidade’ reprezenta oportunidade úniku ida ba membru husi sosiedade sivil Timor-Leste nian, reprezentante hosi organizasaun internasionál sira, no ema Austrália sira ne’ebé iha interese atu esplora hamutuk asuntu ida ne’ebé krítiku, maibé dala barak ladún fó importánsia ba. Objetivu prinsipál husi eventu ida-ne’e maka atu harii forum ida ba diálogu refletivu, kolaborasaun no ezame krítiku ba an rasik no grupu maluk sira atu nune’e halo avaliasaun nakloke ida kona-ba organizasaun internasionál sira-nia impaktu ba feto sira-nia moris iha Timor-Leste. Enfoke ba eventu findesemana ida-ne’e tau énfaze ba partisipasaun, diálogu nakloke no kolaborasaun iha ambiente ida ne’ebé seguru no envolvidu. Ida-ne’e realiza tiha liuhosi kombinasaun husi konferénsia, semináriu, ho fasilitasaun ne’ebé profesionál, no mós oportunidade seluk ne’ebé ladún formál ba ema atu halo interkámbiu sosiál.
Durante loron tolu maizumenus ema na’in 150 maka mai Melburne hosi Austrália no hosi Timor-Leste hodi halo diskusaun hamutuk kona ba asuntu hirak ne’e; atu fahe informasaun ba malu, halo debate no rona kona-ba ida-idak nia esperiénsia. Relatóriu ida-ne’e nu’udar tentativa ida atu reflete idea balu ne’ebé fahe ba malu iha forum ida-ne’e. Ne’ebé ema voluntáriu sira maka tau hamutuk, ami hein katak ema haree relatóriu ida-ne’e hanesan dokumentu ida ne’ebé sei bele dezenvolve liután abain-bainrua. Nune’e mós, ami hein katak ema haree forum ida-ne’e nu’udar oportunidade ida ba diskusaun, no mós katak diskusaun formál nakloke entre indivíduu no organizasaun sira kona-ba tema ida-ne’e sei kontinua nafatin ho maneira oin-oin no iha fatifatin ba futuru.