Konaba Programa 'Peskiza Timor-Leste' iha Universidade RMIT

Programa Peskiza Timor-Leste nia hun-fatin iha RMIT University (Melburne, Austrália), no liuliu iha Centre for Global Research (uluk bolu Globalism Research Centre) nia laran. Peskizadór sira hosi Centre for Global Research hala’o servisu iha Timor-Leste hori tinan 2003 no, hanesan mós iha fatin seluseluk iha Austrália no Ázia-Pasífiku laran, ami-nia knaar intelektuál mahuluk mak atu komprende prosesu sira kona-ba mudansa no kontinuidade, no mós atu hanoin kona-ba kestaun polítika no kulturál sira hanesan nasaun nia formasaun iha mundu nia globalizasaun laran. Ami haka’as an atu servisu hodi hakat liu divizaun entre teoria abstrata no peskiza aplikada no ami buka dezenvolve ligasaun kolaboradora forte ho komunidade, sosiedade sivíl no organizasaun estatál sira iha ami-nia área peskiza sira.